सुनसरीको इटहरी स्थित व्यापारिक भवन सेन्टर प्लाजामा भिषण आगलागी भएको छ । आगलागी अझै नियन्त्रणमा आउन सकेको छैन ।
अहिले आगोलागीको नियन्त्रण प्रयास भइरहेको छ । लगभग ८० प्रतिशत आगो नियन्त्रणमा आए पनि पूर्ण रुपमा नियन्त्रण भने भइसकेको छैन । इटहरी प्रहरीले जनाए अनुसार
प्लाजामा बिहान साढे ९ बजेदेखि भएको आगलागी भएको हो ।
नेपाली सेना, नेपाल प्रहरी र सशस्त्र प्रहरीसहितले आगो नियन्त्रणको प्रयास गरिरहेका छन् । आगलागीको कारण खुलिसकेको छैन । प्लाजामा फसेकाको उद्धारका लागि नेपाली सेनाको हेलिकप्टर प्रयोग गरिएको छ । उक्त प्लाजाको चौथो तलामा आगलागी भएको थियो ।सोही प्लाजाको सातौं तलामा फसेका ११ जनाको उद्धार गरिएको प्रहरीले जनाएको छ ।
घटनामा ३ जना महिला र ८ जना पुरुषको उद्धार गरिएको हो । उद्धारमा खटिएका ७ जना सुरक्षाकर्मी सामान्य घाइते भएका छन् । नेपाल प्रहरीका ५, सशस्त्र प्रहरीका १ र नेपाली सेनाका एक जना सामान्य घाइते भएका छन् । आगलागी नियन्त्रणका लागि १२ वटा दमकल प्रयोग गरिएको इटहरी उपमहानगरपालिकाले जनाएको छ ।
