संकल्प सञ्चार / माध्यमिक शिक्षा परीक्षा (एसईई) आजबाट सुरु हुँदै छ । आज बिहान ८ बजेदेखि शुरू हुने एसईई परीक्षामा देशभरका दुई हजार ७९ परीक्षा केन्द्रबाट सञ्चालन हुने राष्ट्रिय परीक्षा बोर्ड, परीक्षा नियन्त्रण कार्यालयले जानकारी गराएकाे छ । आजदेखि सुरु भएर यही चैत १९ सम्म सञ्चालन हुने परीक्षा बिहान ८ देखि ११ बजेसम्म सञ्चालन हुनेछ ।
आज पहिलो दिन अनिवार्य अङ्ग्रेजी तथा संस्कृत वेदविद्याश्रमतर्फ अनिवार्य संस्कृत रचना र मदरसातर्फ अनिवार्य अरेबिक भाषा विषयको परीक्षा सञ्चालन हुनेछ ।
यस वर्षको SEE परीक्षामा पाँच लाख १४ हजार ७१ जना विद्यार्थी सहभागी हुने बोर्डले जनाएको छ । परीक्षामा १५० जनासम्म परीक्षार्थी भएको केन्द्रमा एक जना सहायक केन्द्राध्यक्ष र २० जना विद्यार्थी बराबर एकजना निरीक्षक खटाउने प्रबन्ध गरिएको छ । परीक्षामा ७५ जनाभन्दा कम परीक्षार्थी भएको केन्द्रमा सहायक केन्द्राध्यक्ष नराखिएको बाेर्डले जनाएको छ ।