मुम्बई – बलिउड अभिनेता सैफ अली खानलाई मुम्बईस्थित उनको निवासमा एक अपरिचित व्यक्तिले आक्रमण गरेपछि अस्पताल भर्ना गरिएको छ। घटनापछि उनको स्वास्थ्य अवस्थाबारे चासो व्यक्त गरिएको छ।
घटना बिहीबार राति करिब २ः३० बजे भएको बताइएको छ। त्यो बेला सैफ आफ्नी पत्नी करिना कपुर र छोराहरू तैमुर (७ वर्ष) र जहाँगिर (३ वर्ष)सँग सुतिरहेका थिए। आक्रमणको क्रममा करिना र बालबालिकाहरू भने सुरक्षित रहेको भारतीय सञ्चारमाध्यमहरूले जनाएका छन्।
मुम्बई प्रहरीले दिएको जानकारी अनुसार, एक अपरिचित व्यक्तिले सैफ अली खानको घरभित्र प्रवेश गरेर त्यहाँका घरकामदारसँग विवाद गरेका थिए। उक्त विवादलाई साम्य पार्न सैफले हस्तक्षेप गर्दा आक्रमणकारीले उनलाई धारिलो हतियारले प्रहार गरे। सैफलाई छ चोट लागेको छ, जसमध्ये दुई गहिरो छन्। एक चोट त उनको मेरुदण्डको नजिक रहेको बताइएको छ।
सैफलाई तत्काल मुम्बईको चर्चित लीलावती अस्पताल पुर्याइएको थियो। अस्पतालका डाक्टर निरज उत्तमानीका अनुसार, उनलाई शल्यक्रियाको आवश्यकता परेकाले बिहान ३ः३० बजे अस्पताल भर्ना गरिएको हो। उनको शल्यक्रियामा न्यूरोसर्जन नितिन डांगे, कस्मेटिक सर्जन लीना जैन, र एनेस्थेटिस्ट निशा गान्धी संलग्न भएका छन्।
डाक्टरहरूले सैफको चोटको गम्भीरताबारे शल्यक्रिया पूरा भएपछि मात्रै विस्तृत जानकारी दिन सकिने बताएका छन्। अस्पताल स्रोतका अनुसार, शल्यक्रिया सफल भएको छ र अहिले उनी रिकभरी कक्षमा छन्।
मुम्बई प्रहरीले यस घटनालाई गम्भीर रूपमा लिएर अनुसन्धान सुरु गरेको छ। प्रहरीका अनुसार, घटनास्थलबाट प्रमाण संकलन गरी संदिग्धलाई पत्ता लगाउन टोली गठन गरिएको छ। सैफको घरमा कार्यरत तीन जना कर्मचारीलाई सोधपुछ गरिएको छ, जसमध्ये एकजना पनि घाइते भएका छन्।
सैफ अली खान बलिउडका वरिष्ठ अभिनेता भएकाले यो घटना फैलिएपछि उनका प्रशंसक र बलिउडका अन्य कलाकारहरूले गहिरो चिन्ता व्यक्त गरेका छन्। उनका प्रशंसकहरूले सामाजिक सञ्जालमार्फत उनको शीघ्र स्वास्थ्यलाभको कामना गरिरहेका छन्।
यो घटना बलिउड क्षेत्रका सेलिब्रिटीहरूको सुरक्षाप्रति पनि गम्भीर प्रश्न खडा गर्ने खालको बनेको छ।
