काठमाडौं – राष्ट्रिय स्वतन्त्र पार्टी (रास्वपा) को पूर्व महामन्त्री तथा प्रवक्ता मुकुल ढकाल पार्टीको केन्द्रीय समिति बैठकको निर्णयपछि अनुशासनात्मक कारबाहीमा परेका छन् । समितिले ढकाललाई महामन्त्री, प्रवक्ता र केन्द्रीय सदस्य पदबाट हटाउने निर्णय गरेको छ ।
कार्यवाहक प्रवक्ता मनिष झाले अनुशासन समितिले ढकाललाई साधारण सदस्यका रुपमा समेत हटाउन सुझाव दिएपनि केन्द्रीय समितिले त्यस्तो कदम नचालेको स्पष्ट पारे । ढकालले केन्द्रीय समितिको निर्णयमा असहमत भएमा पुनरावेदन गर्न ३५ दिनको समय दिएको छ ।
यसैगरी, बुधवार जेठ २० गते बसेको बैठकमा केन्द्रीय समितिले ढकाललाई महामन्त्री र प्रवक्ताको भूमिकाबाट सात दिनका लागि अस्थायी रूपमा निलम्बन गरेको थियो । यो निलम्बन अनुशासन आयोगलाई थप कारबाही गर्न सिफारिस गर्न निर्देशन सहित आएको हो।
ढकालले यस निर्णयप्रति असन्तुष्टि व्यक्त गर्दै आफ्नो पक्ष प्रस्तुत गर्ने मौका नदिई कारबाही गरिएको दाबी गरेका छन् ।
यता मुकुल ढकालले भने सामाजिक सञ्जाल मार्फत आफुलाई कार्वाही गरिएकाे प्रति असन्तुष्टि जनाउदै स्टाटस लेखेका छन् । उनी लेख्छन् :रवि लामिछाने क्लवबाट निस्कासित भएको हुँ । राष्ट्रिय स्वतन्त्र पार्टी भित्र घण्टी बज्न रोकिँदैन , रविको पार्टीबाट राष्ट्रीय स्वतन्त्र पार्टी बनाउने सङ्कल्प रोकिँदैन, घण्टी बज्न रोकिँदैन । बाँकी कुरा भोलि ….
