टोरन्टो : क्यानडाको टोरन्टोस्थित पियर्सन अन्तर्राष्ट्रिय विमानस्थलमा डेल्टा एयरलाइन्सको विमान अवतरणका क्रममा दुर्घटनाग्रस्त भएको छ, जसमा १८ जना घाइते भएका छन्। तीमध्ये २ जनाको अवस्था गम्भीर छ। विमानमा ७६ यात्रु र ४ चालक दलका सदस्य गरी ८० जना सवार थिए।
विमान अमेरिकाको मिनियापोलिसबाट टोरन्टो आइरहेको थियो। अवतरणका क्रममा विमानको पखेटामा रहेका फ्ल्यापहरूले सही रूपमा काम नगरेका कारण विमान पल्टिएको बताइएको छ। केही प्रत्यक्षदर्शीका अनुसार दुर्घटनाको समयमा टोरन्टोमा भारी हिमपात भइरहेको थियो। क्यानडाको मौसम विज्ञान विभागका अनुसार हावा ६५ किलोमिटर प्रतिघण्टाको गतिमा चलिरहेको थियो।
क्यानडाको यातायात सुरक्षा बोर्डले दुर्घटनाको अनुसन्धान गरिरहेको छ भने अमेरिकी राष्ट्रिय यातायात सुरक्षा बोर्डले पनि यसमा सहयोग गरिरहेको छ।
दुर्घटनापछि टोरन्टो विमानस्थलमा २०० भन्दा बढी उडानहरू अस्थायी रूपमा रोकिएका थिए, तर केही घण्टापछि उडानहरू पुनः सुरु भएका छन्।
