संकल्प सञ्चार / मोरङको विभिन्न स्थानहरूमा लागुऔषध र नियन्त्रित औषधीका साथ दुई जनालाई प्रहरीले पक्राउ गरेको छ। भदौ २४ गते साँझ ६ बजे, पथरी शनिश्चरे नगरपालिका-७ का २८ वर्षीय ललित गुरुङलाई आफ्नो घरमा लागुऔषध बेच्ने गतिविधिमा संलग्न रहेको जानकारी प्राप्त भएपछि इलाका प्रहरी कार्यालय पथरीबाट खटिएको टोलीले उनको घरमा खोजी गर्दा ३ ग्राम ३ सय ५० मिलीग्राम ब्राउन सुगर फेला पारेको थियो। त्यसपछि उनलाई नियन्त्रणमा लिइएको छ।
त्यसैगरी, CRV बाँसबारी मोरङबाट खटिएको प्रहरी टोलीले सुन्दरहरैँचा नगरपालिका-७ का २० वर्षीय रुपेश चौधरीलाई बुढिगंगा गाउँपालिका-२, गंगा चोकबाट नियन्त्रित औषधी एभिल, डाइजेपाम र फेनारगनका १७ एम्पुलसहित पक्राउ गरेको हो। लागुऔषध र नियन्त्रित औषधीका मुद्दामा थप अनुसन्धान जारी रहेको छ।
