१. झापामा बस र मोटरसाइकल दुर्घटना:
झापाको बिर्तामोड नगरपालिका–५ हिकोला मोडस्थित सडकमा प्र.१–०२–००२ ख ००३५ नम्बरको बसले प्र.१–०१–०१३ प ५७०० नम्बरको मोटरसाइकललाई ठक्कर दिँदा मोटरसाइकलमा सवार इलाम माई नगरपालिका–४ गैरीगाउँका ३० वर्षीय तुलसा पाँचकोटीको मृत्यु भएको छ। शनिबार दिउँसो भएको दुर्घटनामा गम्भीर घाइते भएकी उनको बीएण्डसी अस्पताल बिर्तामोडमा उपचारको क्रममा निधन भएको हो। मोटरसाइकल र बस चालकलाई प्रहरीले नियन्त्रणमा लिएको छ।
२. रूपन्देहीमा साइकल दुर्घटना:
रूपन्देहीको लुम्बिनी सांस्कृतिक नगरपालिका–११ कोठी पुलस्थित सडकमा शनिबार राति भएको सवारी दुर्घटनामा एक पुरुषको मृत्यु भएको छ। लुम्बिनीबाट कपिलवस्तुतर्फ जाँदै गरेको साइकल अनियन्त्रित भई दुर्घटनामा परेको हो। परिचय नखुलेका करिब २५ वर्षीय पुरुषको भीम अस्पताल भैरहवामा उपचारको क्रममा मृत्यु भएको हो।
३. कैलालीमा मोटरसाइकल र ट्रकको ठक्कर:
कैलालीको गोदावरी नगरपालिका–१ स्थित सडकमा भएको सवारी दुर्घटनामा एक युवकको मृत्यु भएको छ। सडकमा रोकी राखेको ना.४ ख ९६३ नम्बरको ट्रकमा से.५ प ५८२७ नम्बरको मोटरसाइकल ठोक्किँदा मोटरसाइकल चालक धनगढी उपमहानगरपालिका–२ भन्सार रोडका २९ वर्षीय कैलाश थापाको मृत्यु भएको हो। गम्भीर घाइते भएका उनको सेती प्रादेशिक अस्पताल धनगढीमा उपचारको क्रममा निधन भएको छ। मोटरसाइकलमा सवार एक व्यक्तिको उपचार अत्तरियामा भइरहेको छ। ट्रक चालकलाई प्रहरीले नियन्त्रणमा लिएको छ र दुर्घटनाको अनुसन्धान जारी छ।
